Comunicat de l’IEO : una volontat de menar una politica lingüistica ?

L’IEO a pres acte, aitant coma totei lei personas e associacions concernidas per la question dei Lengas Regionalas, de la votacion a l’Assemblada Nacionala (per la bèla part dei deputats presents - 63 votz sus 66 exprimidas - e mai en premiera lectura) de la proposicion de lèi per la promocion dei lengas regionalas portada per Annia Le Houérou*, aquest dimars 31 de genièr.
Après leis avançadas de la lèi Peillon sus l’ensenhament bilingüe, après la reconoissença de la discriminacion per rason de lenga dins la lèi de Modernizacion de la Justícia dau sègle XXIn dau 18 de novembre 2016, aquesta proposicion de lèi sembla un pas de mai que dona un estatut ai lengas de França.
Alevat que, per cu i regarda de pròche, la ratificacion de la Carta europenca siguèt possibla quand la senèstra, au començament de la mandatura, teniá lo Senat, e qu’una lèi se podiá votar adarrè.
Adonc, repassem un pauc lei trecimacis d’aquestei cinc darriereis annadas :
– 2012, nos prometon la ratificacion de la Carta.
– 2013, nos dison que se pòt pas faire, estent l’arrèst dau Conseu Constitucionau, çò qu’empacha pas de demandar un rapòrt a la ministra de la Cultura que definiriá la lista dei mesuras aplicadoiras sensa passar per la ratificacion de la Carta. (Rapòrt plaçat au demembrier despuei. Degun a jamai cercat de n’en tirar un aplicacion).
– 2014, proposicion de lèi constitucionala qu’autoriza a ratificar la Carta, lo tèxte es adoptat a la majoritat qualificada ambe 361 votz Per, mai lo Senat declara que luòc i a pas de l’examinar.
– 2015, nos sòrton mai una promèssa de ratificacion... lèu mesa de caire...
– 2016, fin de la mandatura, e de nos presentar, en fin de corsa, lo vòte d’una novèla lèi (minimalista).
Alevat que lo tèxte de lèi - adoptat mens d’un mes avans la bèla finida de la session parlamentària - a encar d’èstre adoptat per lo Senat. E estent que lo Govèrn s’es pas engatjat a inscriure lo tèxte a l’òrdre dau jorn dau Senat e que lo trabalh dei deputats s’arrèsta a la fin de febrier, la capitada n’es ipotetica.

La realitat es, per clavar, qu’aquesta mandatura, pas mai que la precedenta, aguèt la volontat de menar una politica linguistica publica en favor dei lengas regionalas.
Ges d’estatut en França per sei lengas patrimonialas. Quauquei brigas escarsas tolèron son emplec, mesuretas facilament remesas en question per l’administracion.

L’IEO demanda a totei sei sòcis e mai a totei leis defensors de l’occitan d’interpelar lei senators-tritz per lei butar a examinar lèu lo tèxte e votar aquesta lèi, se per còp d’astre, fasiá tèsta.

Pèire Brechet
President de l’IEO


* tèxte inicialament despausat per Brunon Le Roux. L’article 8 foguèt suprimit.