LA COTISACION 2025 : LO MONTANT DE L’ESCOTISSON, LA TARIFA REDUSIDA, LA VERIFICACION DE MAS DONADAS

LA COTISACION 2025 : LO MONTANT DE L’ESCOTISSON, LA TARIFA REDUSIDA, LA VERIFICACION DE MAS DONADAS

Lo montant de l’escotisson
A l’amassada generala de Nimes foguèt votat a l’unanimitat un novèl montant de la cotisation a l’IEO per l’annada 2025, mai de condicions novèlas per beneficiar de la tarifa redusida. D’efiech, l’escotisson pòt èsser considerat coma un don a l’associacion IEO, qu’en retorn pòt donar una atestacion de don, permetent a l’aderent de beneficiar d’una reduccion d’impòst sul revengut de 66%, dins lo limit de 20% del revengut impausable.

La tarifa redusida, jusc’adara reservada als joves e als caumaires, es ara accessibla a las personas non impausadas, qu’alavètz pòdon pas aver de reduccion d’impòst. Concretament, aquò’s una baissa del cost vertadièr d’adesion a l’IEO per 2025, siá gràcia a una reduccion d’impòst, siá gràcia a la tarifa redusida.

Lo montant de la cotisa per l’annada 2025 es :
adesion individuala normala : 30 € individuala redusida : 12 €
adesion coble normala : 40 € coble redusida : 16 €
associacion (persona morala) : 50 €

l’adesion a l’IEO : coma far?
L’adesion a l’IEO se pren coma de costuma al prèp de sa seccion. La tarifa redusida es aplicada sus justificacion de l’absencia d’impausicion sus lo revengut. Es la seccion d’adesion que reçaup lo pagament de la cotisa e las coordonadas de cada aderent, al minimum lo nom e l’adreça postala, e si possible l’adreça electronica, necessària a l’aderent per poder verificar sas coordonadas enregistradas, e per reçaubre las informacions mandadas per l’IEO. Emai se nos agrada gaire, que lo podem pas far en occitan, es important de donar l’adreça postala en seguent las novèlas nòrmas de presentacion de l’adreça postala. Si que non, la Posta refusa de distribuir lo corrièr destinat als aderents, notadament la revista de l’IEO Anem Occitans !.

L’adesion a l’IEO : verificar sas donadas personalas, recuperar son atestacion de don
L’IEO, e cada de sas seccions, an mestièr, coma tota associacion, de constituir un fichier de sos aderents.
Dempèi mai de 20 ans, aquèl fichier es informatizat: las coordonadas dels aderents son sasidas per la seccion d’adesion, e transmesas a l’IEO “nacional”. Jusc’adara, aquò se fasiá per escambis e recampament de tabladors, un sistèma gaire eficaç, generator d’errors, non securizat, e de mai contrari au reglament general de proteccion de las donadas (RGPD), qu’impausa lo drèit de cada persona de controtlar sas donadas personalas. Per se metre en conformitat amb la RGPD e dispausar d’un sistèma de qualitat per la securitat de las donadas, l’IEO a decidit d’utilizar l’aplicacion “Galette” per constituir lo fichièr de referéncia dels aderents a l’IEO. Es una aplicacion desvolopada de faiçon dobèrta e participativa per d’associatius a destinacion del monde associatiu per facilitar la gestion de las adesions.

L’utilizacion de “Galette” càmbia pas lo biais de préner son adesion, que se fa totjorn al prèp de sa seccion. Permet d’un costat de constituir lo fichièr dels aderents de faiçon precisa e securizada, e actualizat en temps real. Ben-segur, l’IEO s’engatja a utilizar aquelas donadas sonque per comunicar als aderents las informacions pertocant l’associacion que n’es membre, per corrier papièr e per corrièr electronic, coma o fasiá abans. D’un autre costat, “Galette” permet a cada aderent de consultar, verificar e eventualament modificar sas donadas personalas, e permet tanben de recuperar l’atestacion de don correspondent al montant de la cotisa. Per aquò far, un còp la ficha sasida per la seccion d’adesion, cada aderent reçaup a son adreça electronica un messatge de “Galette” amb un identificant personal, qu’es un còde securizat per accedir a sa ficha, e lo ligam per s’i connectar.