31 de Març de 2012: ua manifestacion reivindicativa dens la calma e la serenitat

L’IEO que’s felicita deu debanament de la manifestacion, a l’encòp gaujosa e colorada, a la hautor de la revendicacion comuna. L’IEO que tornarà leu suu sens e l’expression de la hola presenta aqueste 31 de març a Tolosa, capitala lo temps d’ua jornada, de la cultura occitana com de la reivindicacion de cap a ua vertadèra reconeishança de la lenga nosta.

Quauques dias après los esveniments tragics de Montalban e de Tolosa, la Coordinacion qu’a saput hicar en plaça, dab los servicis de policia de la comuna e de l’Estat, un dispositiu de securitat deu cortètge de qualitat. L’IEO que profieita d’aqueste comunicat tà tornar exprimir los sons remercejaments a l’ensemble deus benevòles anonims qu’an permetut ua expression calma e serena d’aquesta manifestacion reivindicativa.

L’IEO que ne profieita tanben tà brembar que los esveniments de la nueit deu dissabte au dimenge, que ne son responsables d’un nafrat grèu, e son a l’encòp exteriors e posteriors a la manifestacion « Anem Òc ! Per la lenga occitana » deu 31 de març. En efèit, la manifestacion qu’era acabada a 18h, e lo concèrt hestiu de la plaça deu Capitòli, plan organizat per Convergéncia Occitana, acabat abans mieja-nueit. Dens un comunicat mandat quauques setmanas a, l’IEO, en çò de la Coordinacion, qu’avè exprimit la soa volontat que los grops extremists d’estrèma dreita, d’ideologia opausada a la deus organizators, ne sian pas presents a la manifestacion ; que sembla que sia estat entenut.

L’IEO que torna diser la soa ahida en los servicis de Policia entà definir la responsabilitat de’us que ne son responsables, deus esveniments de la nueit deu 31 de març. L’IEO que condemna tanben los responsables deu raubament de la banderòtla, installada d’òra aus jardins Compans-Caffarelli, dab l’eslogan de Carcassona en 2009 : "La lenga que parlam es patrimòni de l’umanitat". Qu’ei de créder qu’aquesta banderòtla, dab un messatge autant evident com reconeishut au nivèu mondiau, n’èra pas partetjat peus que pensan que, au contra de la Coordinacion e donc de l’IEO, la manifestacion qu’èra organizada a l’entorn de valors com tolerància, paratge, ubertura aus autes. Totun, e l’IEO que se’n felicita, n’a pas avut nat incidéncia per la manifestacion ; au contrari, qu’ahorteish la desmarcha de l’IEO entà conscientisar e socializar la poblacion de cap a la lenga e a la cultura occitanas.

l’Institut d’Estudis Occitans

* La Coordinacion : Institut d’Estudis Occitans – IEO, Calandretas e Oc-Bi, en partenariat dab Convergéncia Occitana e CREO-MP