Aprenem l’occitan : novèla estrategia per 2013

Per sa cinquena annada, Aprenem l’occitan necessitava d’una reformulacion radicala per s’adaptar al contèxte actual d’ensenhament de l’occitan. Aprèp mai d’una soscadissa sus las resultas passadas, nos sèm renduts compte de la necessitat de tornar concebre lo visual de la campanha e lo messatge menat. D’en primièr, nos semblèt mai eficaç de simplificar la presentacion textuala : coma lo projècte s’adreiça mai que mai a un public non-occitanofòn o illetrat en lenga occitana, avèm limitat l’emplec de l’occitan al jostítol Libertat, jòia, bonaür, plaser e daissat Apprenons l’occitan sonque en francés. Per alhors, la causida del novèl jostítol venguèt de l’enveja de balhar un aire mai fresc als cartèls e desplegants, tot en passant per la concepcion grafica. Los carrats se remplacèron per de corbas, lo blau del fons ganhèt mai tonalitats. Representant una femna amb los braces dobèrts dins lo campèstre, l’imatge causit seguís la meteissa linha : aquí lo mot d’òrdre es satisfaccion.

Paralèllament, mantunas estructuras de’n pertot nos envièron las entresenhas actualizadas de lors activitats : tot es de consultar dins lo site aprenemloccitan.com. Fins septembre, totes los corses presents dins la tièra auràn recebut lo material de comunicacion d’Aprenem l’occitan. Entre septembre e octobre, lo departament de Tarn e Garona utilizarà nòstre visual sus d’abribuses.