Sètz aicí : Acuèlh > Nòstras missions > Centre de ressorgas > Transmission naturala e familiala de la lenga occitana

Transmission naturala e familiala de la lenga occitana

Congrès europèu sus la transmission naturala e familiala de la lenga occitana e de lengas minoritàrias d’Euròpa organizat lo 20 e 21 de novembre a Tarba per l’IEO.

Transmission naturala e familiala de la lenga occitana

La transmission naturala d’una lenga, dins las familhas, entre las generacions, dins l’encastre professional, dins l’environament social, es indispensable per la transmission de tota lenga. Aquesta transmission es reconeguda per totes los lingüistes coma un biais fòrça eficaç per transmetre una lenga.

 

Solament, uèi la transmission naturala de l’occitan es paura. Es essencial de tornar activar aqueste mejan de transmission de la lenga occitana en mai de la transmission assegurada per l’escòla e los corses per adultes, per assegurar aital un desvelopament de la lenga per las decennias que venon.

Totas las politicas lingüisticas d’Euròpa e del mond an pres en compte aquesta dimension. Manca uèi en Occitània una vertadièra soscadissa sus aquestas problematicas, d’objectius clars e d’accions concretas de menar de dimension interregionala.
Es per aquò que l’Institut d’Estudis Occitans organiza los 20 e 21 de novembre de 2009 a Tarba un congrès sus aquel tèma.

Seguidas del congrès

Los actes du congrès

Los actes audio del congrés son disponibles en DVDRom al prèp de l’IEO.
Lo DVD conten :

 

 una version audiò dels dos jorns de congrés europenc dins totas las lengas accessiblas a l’escota e traduitas en simultanèa en francés, occitan, anglés, espanhòl.
 las comunicacions escritas des intervenents.
 qualques fòtos de l’eveniment.

Prètz : 6€.
Pack Actes del congrés+ Film sur la transmission familiala : 11€.
Bon de commanda

 

Lo DVD sus la transmission familiala de l’occitan

Dos filmes de 6 e 8 minutas e un bonus de 3 minutas registrats al moment de la manifestacion de Carcassona lo 24 d’octobre de 2009 per Piget Produccion.

Mos parents m’an transmetut 6 minutas 20.
Parli occitan a mos enfants 8 minutas17.
+ Bonus 2 minutas 58.

Filme en occitan sostitolat en francés.
La transmission familiau e naturau de la lenga occitana, Piget produccion, IEO, 2009, 7€, 14 minutas.

Passatz la vòstra comanda e mandatz lo vòstre chèc amb vòstras coordonadas a l’IEO.
Mai d’infos

De talhièrs pels parents a prepaus de la transmission familiala de la lenga occitana seràn organisats en 2010.


Editorial del programa del congrès, per David Grosclaude, President de l’Institut d’Estudis Occitans.

Tornar téisher lo ligam

La question de la transmission familiau qu’ei ua question màger entà
l’aviéner de la lenga occitana.
Pendent detzenats d’annadas, tot qu’estó hèit entà que los pairs e
deishèssen de transméter la lenga aus mainatges. Qu’èra un element
centrau de la politica lingüistica en França. Tà l’occitan e las autas lengas
de França qu’estó quasi lo còp de la mort. Tot qu’èra hèit entà que los
pairs estossen vergonhós de la lor lenga. Que calèva que los mainatges
estossen copats de la lenga qui’s parlavan sovent los pairs enter eths.

N’ei pas necessari d’estar hòrt sapient en psicologia entà compréner qu’aquò
avó consequéncias malastrosas sus ua generacion, e quitament sus mantuas.
L’occitan, com las autas lengas minorizadas, qu’èra ua lenga vergonhosa.
N’èra quitament pas ua lenga. Tot aquò qu’averé podut miar la lenga
occitana a la mort ; mes a maugrat de tot qu’a resistit.

Uei que devem tornar téisher lo ligam lingüistic familiau quan ei enqüèra
possible o que’u cau tornar crear, còps que i a dens un paisatge arroeinat.
Los domaus psicologics de decenias de denigrament e de mesprètz non
pòden estar denegats. Que’us cau conéisher, que’n cau préner la pagèra
entà bastir la politica lingüistica de doman.

Ua generacion navèra qu’ei a vóler préner en carga l’aviéner de la lenga.
Aquesta qu’a besonh de conéisher aquera istòria dab las dolors
e los traumatismes qu’engendrè. Que comprenerà miélher las dificultats
qui trobarà suu camin qui a causit.

Que cau ajudar aquera generacion en li amuishar que la transmission
de la lenga en familha e’s pòt apear sus aisinas exterioras com l’escòla
o los mèdias per exemple. De tornar socializar la lenga occitana
no’s pòt pas har shens arrevitar la transmission familiau.
En un sègle totun lo monde qu’a cambiat. La lenga qu’ei tostemps
un objècte politic mes l’environament qu’ei diferent ; los enjòcs
non son pas los d’un còp èra.

L’occitan qu’ei un ben collectiu. Qu’ei lo de tots los qui’u parlan
e de tots los qui, per non pas estar locutors, desiran totun que d’autes,
qui vieneràn après eths, e’u poscan parlar.

Lire la page en français
Portfòlio de l'article
Fichièrs de descargar