L’Institut d’Estudis Occitans es una associacion creada en 1945, reconeguda d’utilitat publica en 1949, qu’a per tòca lo contunh e lo desvolopament de la lenga e de la cultura occitanas dins son ensem.
Objectius
Tot lo mond que son a l’ora d’ara a l’Institut d’Estudis Occitans (IEO) trabalhan per que l’occitan trapèsse sa plaça legitima, la d’una granda lenga d’Euròpa. Es per aquò que l’IEO se bolèga per obtenir una plaça mai importanta per l’occitan dins la vida publica, los mèdias, l’ensenhament.
L’IEO, es tanben una accion quotidiana de cada aderent per que la cultura occitana siague una cultura viva e contemporanèa, creatritz e innovanta, qu’assuma tanben son istòria.
L’IEO, es la volontat d’amassar los esfòrces de totes los que vòlon que l’occitan trapèsse sa plaça dins una diversitat culturala essenciala dins la societat d’uèi.
Aquesta batesta, venètz la partejar ambe nautres, los 2100 aderents e 40 emplegats que trabalhan dins las diferentas associacions federadas del malhum de l’IEO. Podètz vos marcar dins l’una de las 30 seccions despartamentalas e 7 seccions regionalas que federam, o directament alprèp de l’IEO.
L’IEO sosten la promocion e l’ensenhament de l’occitan dins lo respècte de sa diversitat dialectala. L’IEO recomanda l’emplec de la grafia que se ditz classica o normalizada que permet lo respècte d’aquesta diversitat dialectala e lo de l’unitat de la lenga.
Es la grafia admetuda oficialament per l’ensenhament de l’occitan sus l’ensem de son airal, comprés lo Val d’Aran e las valadas occitanas d’Itàlia.
Fonccionament en malhum
L’IEO es una associacion lei 1901 reconeguda d’utilitat publica (1949) e agreada Joinessa e educacion populara (1986).
Podètz aderir a l’IEO preferénciament per l’intermediari d’una seccion departamentala (o en cas, regionala), o per una adesion dirècta a l’IEO - dins los dos cases, lo prètz d’adesion es lo meteis.
L’IEO es dubèrt a totes los que desiran la promocion e lo desvolopament de l’occitan e se reconeisson dins las tòcas e orientacions de l’associacion.
L’actual Conselh d’Administracion de l’Institut d’Estudis Occitans se compausa de membres elegits al moment de las Amassadas Generalas de 2019 (Puèglaurenç) e de 2020 (Castelnau d’Ari).
Lei membres dau Conseu d’Administracion 2021-2022 son :
ARNAUD Michel - Miquèu ARNAUD membre dau CA per president de IEO Provença País aupenc País niçard, Vice president de la seccion IEO 13, President dau ceucle Charrar Provençau
Copresident en carga de l’IEO-Difusion
ARNAUD Jacqueline - Jaumelina ARNAUD membre individuau Sòcia de la seccion IEO 13
Membre dau burèu, en carga de la pichona enfança
BONNERT Christian - Cristian BONET membre individuau (ex president IEO Auvèrnhe)
Copresident : Comission revista AO
BRECHET Pèire - Pèire BRECHET membre individuau Ancian president
Membre del burèu, Fa ofici de oebmèstre, Projècte Geoccitania, Projècte Protocole de Donostia
CAHUZAC Thierry - Tederic CAHUZAC membre individuau, president de Gascon @s cap e tot (IEO 40), membre de l’Ostau occitan (IEO 33)
Copresident cargat de la conferéncia deus Presidents de seccions departamentaus
CHAMBARAUDAlain - Alèm/Alan CHAMBARAUD membre dau CA individuau, aderent de L’Ostau Occitan - seccion de l’I.E.O. per lo despartament de Gironda
Membre del CA Comission revista AO
FRAJ Eric membre dau CA per president de la seccion regionala Occitania-P.M
LAJUDIE David membre dau CA per president IEO LIMOUSIN
MEJEAN Isabelle - Isabèu MEJAN membre individuau, clavaira de l’IEO Droma (26), Viça presidenta de la seccion regionala ARA de l’IEO
Clavaira
NICOLAS Michel - Michèu NICÒLAS membre individuau, President de la seccion departementala IEO CHARANTA, «La Tauvera», Animator de l’Escola occitana de Terra d’Òc
POUJADE Clamença - Clamença POJADA membre individuau Adesion a l’IEO09
Vice presidenta en carga del secretariat adjunt
ROUX Étienne - Estefe ROS membre individuau, Aderent seccion IEO24
Copresident en charja de l’Ieo-Edicion
ROUX Jean - Joan ROS membre dau CA per president de la seccion regionala Auvèrnhe-Ròse-Aups
Membre del burèu
TOURTET Eliane - Eliana membre individuau, Seccion IEO 04-05 / Espaci Occitan dels Aups (secretaria), Sòcia dau FORUM d’OC, Benevòla dei Rescòntres Occitans en Provença (estagi d’estiu)
Copresidenta cargada de las relacions amb las Valadas occitanas e relacions Extèrnas, Comission revista AO
VIDAL Marc membre individuau membre del CA de l’IEO-OPM et IEO 31
Vice president cargat del secretariat, Ligams amb lo nivel francés e Internacional (ELEN) Lo burèu, elegit pr dos ans (2019-2021), se compausa de : Pèire Brechet, Isabèla Mejean, Estefe Ros e Jaumelina Arnaud.
L’IEO es organizada en seccions regionalas, seccions departamentalas e cercles locaus que cubrisson l’ensem de l’airal occitan. Cadun assegura los objectius de l’IEO sus son territòri d’accion dins l’agach de sas especificitats istoricas, geograficas e umanas sieunas.
De mai, divèrses sectors, associacion afiliadas o membres de l’IEO se mainan d’activitats especificas.
L’IEO es membre del Malhum Europèu de Promocion de la Diversitat Lingüistica (NPLD), del Comitat Francés de las Lengas las mens Espandidas (EBLUL França), del European Language Equality Network (ELEN) e dels Rencontres Interregionals de la Lenga e Culturas Regionalas que recampan reprensentants de las diferentas lengas de França. L’IEO es tanben un club UNESCO (veire la Federacion Francesa per l’UNESCO).
Desplegant de presentacion
Véder lo document en pèça aponduda a l’article.
Se pòt demandar la version papièr a l’IEO, o a l’una de las soa seccion o cèrcle afiliat.
Las grandas orientacions de l’IEO
Viure l’occitan cada jorn
L’IEO participa a la socializacion de la lenga e a la reconeissença de la cultura occitana per sas accions (Veire tanben la rubrica d’informacion sus la lenga occitana) :
–L’occitan qu’es aquò ?. Es un document de comunicacion a destinacion del grand public (format tabloïd editat en mai d’una version dempuèi 2007) sus la lenga e la cultura occitana.
– Las Paginas occitanas : es un annuari internet que recensa los actors d’Occitània, que siá al nivèl economic coma al nivèl cultural (anatz sus Paginas Occitanas).
– Lo Servici de l’emplec : es lo primièr servici que bòta en relacion emplegaires e demandaires d’emplecs a l’entorn de lor competéncia en occitan, mas pas solament. Vos esperam sus emplec.com.
– L’IEO es a l’iniciativa de la creacion de la coordinacion «Anem Oc», bastit en 2004 e a l’origin de grandas manifestacions per defendre la cultura occitana en 2005, 2007 e 2009. Membre de la coordinacion «Per la lenga occitana», organisèt la manifestacion de Tolosa en març de 2012 qui recampèt 30 000 personas per las carrièra de la ciutat mondina. Aquela coordinacion revendica la mesa en plaça de politicas lingüisticas per desvelopar l’emplec de la lenga occitana dins los medias, la creacion artistica, l’ensenhament et la vida publica.
Centre de ressorgas e de recercas –Servici del patrimòni toponimic : informacion, recercas toponimicas e ajuda a la mesa en plaça de senhaletica bilingüa ;
–Traduccion e conselhs lingüistics : traduire, conselhar e tornar repassar, e balhar propausicions terminologicas. L’IEO publiquèt lexics terminologics en biologia, matematicas, e telefonia mobila.
– L’IEO e lo Conselh Generau d’Aran son a l’iniciativa deu Congrès Permanent per la Lenga Occitana qu’a per tòca de refortir l’unitat de la lenga occitana dins lo respècte de sa diversitat.
Los corses d’occitan per adultes – L’IEO associat al Centre de Formacion Professionala Occitan (CFPO) realiza una campanha de promocion annadièra dels corses d’occitan per adultes sus tot l’airal occitan, mas tanben sus internet e per correspondéncia. (afichas, plaquetas, siti oèb : www.aprenemloccitan.com).
– Per desvelopar la qualitat de l’ofèrta de formacion en occitan per adultes, l’IEO e lo CFPO se son associats per crear PARLESC, lo malhum labellizat de corses d’occitan per adultes.
Le sector libres –L’IEO Edicions e l’IEO Difusion (que se disián amassa IEO-IDECO), asseguran dempuèi Puèglaurens (81) l’edicion de libres e la difusion/distribucion de nombroses editors en occitan. L’IEO Edicions es essenciaument sostengut per lo Centre Regional du Livre (CRL) de Miègjorn-Pirenèus. En ço de la federacion, mantunas seccions departamentalas e regionalas desvelopan tanben una activitat d’edicion (libres, revista, CD), sovent en sòci amb l’IEO Edicions e difusats per l’IEO Difusion.
– L’IEO publica la revista trimesadièra Anem Occitans !, qu’es recebuda per cada aderent de l’associacion, que fa d’ela una de las revistas occitanas las mai importantas.
