Manifestacion per la lenga occitana a Tolosa, zo !
« Anem Òc ! Per la lenga occitana ! »
Aqueste dimècres 30 de novembre, a l’Ostal d’Occitània, carrièra Malcosinat, los representants de las associacions membras de la "Coordinacion per la lenga occitana" an oficializat lo lançament dels preparatius a la granda manifestacion que se debanarà lo dissabte 31 de març de 2012 a Tolosa al temps d’una conferéncia de prensa.
Aprèp las manifestacions de Carcassona e de Besièrs, qui veguèron lo nombre de manifestants créisse de 10 000 a 25 000 entre 2005 e 2009, l’Institut d’Estudis Occitans (IEO), representat per Ana-Maria Poggio (Vice-presidenta), la confederacion de las Calandretas (escòlas imersivas en occitan), e Òc-Bi (l’associacion de parents d’escolans per l’ensenhament public laïc a paritat francés/occitan), associats a Convergéncia Occitana e al CREO Miègjorn-Pirenèus, an l’intencion de se convidar dins lo debat presidencial e de las legislativas de 2012.
Solide, las lengas regionalas foguèron reconegudas en 2008 dins la Constitucion, dins l’article 75-1 coma pertanhent al patrimòni de la França ». Mas segon los organizators, "en delà d’una reconeissença en engana-l’uèlh, cap d’avança reala foguèt possibla amb aquel article que lo quite Consèlh Constitucional a jutjat coma ’decoratiu’. Es l’ora qu’una lei nos balhe un vertadièr estatut juridic a nòstras lengas". Las quatre orientacions revendicativas retengudas pels organizadors son las mèdias, la creacion culturala, l’educacion e l’ensenhament, e la preséncia de la lenga occitana dins la vida publica.
Los organizadors ja rescontrèron los representants de la comuna de Tolosa, del departament de Nauta Garona, e de la region Miègjorn Pirenèus. Totes lors assegurèron lor sosten dins un contèxte favorable a la lenga occitana, coma z-o a recentament demonstrada una enquista de la region sus l’interés sus la lenga. Mas la manifestacion a una portada interregionala e òm espèra que siá l’ensem de las uèit regions concernidas per la question occitana a s’engatjar, al mens a travèrs de declaracions de sosten, al benefici d’aquela manifestacion. La tòca de las associacions occitanas es clara : "es indispensable que l’Estat, nòstre futur president, nòstres futurs deputats s’engatgen e garantiscan los drèits de las lengas regionalas per una lei !".
Ana-Maria Poggio assolidèt l’engatjament de l’associacion, coma membra a part entièra de la Coordinacion, en remembrant las avanças obtengudas al benefici de la lenga occitana, emai las decepcions a l’origina de la manifestacion de 2012.
Remembrèt tanben l’afar dels panèls de Vilanòva de Magelona (un dangièr pels automobilistas segon lo còdi de la rota e los tribunals) que se deurià retirar e desplaçar ; la situacion contradictòria dels panèls en occitan a Tolosa, que lo Prefècte demandèt de tornar instalar jos la version francesa e fin-finala lo cas recent del refús d’enregistrar a l’ostal de la comuna de Tolosa un pichòt nom occitan pr’amor qu’una letra utilizada (un i amb un accent agut) es pas una letra de l’alfabèt francés. Totes aqueles afars demòntran, s’èra encara mestièr, las dificultats rescontradas per tornar balhar a la lenga occitana sa plaça e sa dignitat.
Los organisadors cridèron alara per que totas e totes, occitanofònes o non, occitans d’un jorn o de jamai, a desfilar aiceste 31 de març de 2012 per las carrièras de Tolosa per afirmar naut e fòrt :
"Anem, Oc ! per la lenga occitana"
Qualques fotografias de la conferéncia de prensa :
D’esquèrra a drèita, Lo representant del CREO-MP, Ana-Maria Poggio (Vice-presidenta de l’IEO), Joan-Loís Blenet (President de las Calandretas), Martina Ralu (Oc-Bi), Joan-Loís Laffont (President de la Convergéncia Occitana)
Ana-Maria Poggio, vice-Presidenta de l’IEO e pòrta-paraula permanenta de la Coordinacion "per la lenga occitana"
Los eligits presents : Guy David (Departement de Nauta Garona), Guilhèm Latruvèrsa (Consèlh Regional dels Miègjorn Pirenèus), Joan-Carles Valadièr (Adjunt de la comuna de Tolosa)
