Lo 31 de març de 2012 serà la bèla manifestacion « Anem òc per la lenga occitana !» a Tolosa, mas coma sabètz totes aquela serà tanben una jornada de manifestacions unitàrias per l’ensem de las lengas regionalas. Aital, lo meteis jorn, d’accions variadas son previstas a Baiona, Kemper, Estrasborg, Perpinhan. Per dire de marcar lo punt sus nòstras organizacions respectivas e escambiar sus la metodologia e la comunicacion, lo coordenador de la manifestacion bretona, Gweltaz Ar Fur, faguèt una visita als organizaires al sèti de l’IEO a Tolosa (Gemma Cuni per la Coordinacion e Laurenç Gòsset per l’IEO).

Gweltaz Ar Fur es benlèu pas un desconegut pels militants de las lengas minorizadas. Dins las annadas 70, èra demest Glenmor, Stivell, Servat e Tri Yann per simbolizar lo combat cultural e politic breton, e vendèt prèp d’un milion d’albums. Fòrça implicat dins la creacion del malhum Diwan, que’n foguèt lo primièr president en 1980, creèt una primièra librariá a Kemper, puèi una seconda a Brest – çò que lo menarà a sortir de la scèna en 1984 per se consagrar a-n-aquela ocupacion. Emai Gweltaz Ar Fur organiza cada annada lo Salon Multilingüe del Libre Joinessa de Pluguen (al ras de Kemper, dins lo Finistèrra), qu’a la particularitat de convidar cada annada de representants culturals d’una lenga ou d’un país minorizats – bessai un jorn l’Occitània ?

De tota manièra, aquela visita amicala e calorosa foguèt l’escasença de marcar lo punt sus la manifestacion bretona : conferéncia sul bilingüisme, taula redonda amb d’elegits e de representants (bretons), de candidats a las presidencialas, manifestacion e concèrt, mantun punt comun amb la manifestacion del 31 de març a Tolosa. Pas res es mai normal quand nos remembram que dempuèi la capitada de las manifestacions occitanas passadas (2005, 2007 e subretot 2009) la reivindicacion occitana es considerada seriosa per las autras lengas coma lo basc, lo catalan e lo breton, que fins alara èran a la punta de la reivindicacion culturala.

Una bona rason de remembrar que la mobilizacion e l’afar de totes, que sa bona escasuda dependrà del nombre de personas per carrièras, mas pas sonque : la mediatizacion de nòstras reivindicacions e lo nombre de personas engatjadas en linha sus la Crida (anemoc.org) son encara d’elements qui seràn preses en compte pels politics e pels partenaris culturals. A vòstras plumas, a vòstres clavièrs !