Al Peiron de Montpelhièr lo dissabte 16 de febrièr a 14h, se manifestaràn per carrièras per una vertadièra inclusion de las lengas regionalas dins la refòrma de l’escòla publica

Per deféndre l’occitan a l’escòla! Pel respècte de las promessas fachas!

L’IEO Lengadòc, seccion regionala de l’IEO, se laguia de veire pas cap d’avançada al plan legislatiu per las lengas regionalas. Ni per las promessas del candidat F. Hollande, ni per las asseguranças balhadas a Tolosa al mes de març passat davant 30 000 personas per JP Bel Président del Senat, ni per las promessas tornadas fa gaire per la ministra de la Cultura Aurelia Filipetti, res es pas anonciat que passe lo nivèl de la bona intencion, sens cap d’engatjament precís, sens cap de calendièr, sens esbòç de tèxte. La lei de refondacion de l’escòla presentada pel ministre Vincenç Peillon desconeis del tot la plaça de las lengas regionalas dons l’ensenhament public. Nos avisam un còp de mai que lo mond politic parisenc desconeis – emai vòl pas reconeisser - la part del patrimòni nacional marcada dins la Constitucion de la Republica.

Al plan nacional, l’IEO federal a escrich als parlementaris per los avisar del problèma de l’escòla. L’IEO Lengadòc s’es adreiçada ela, alsparlementaris de la Region.

L’IEO Lengadòc crida lo mond motivats per la salvagarda de las lengas regionalas, de manifestar sa volontat de veire las promessas tengudas. Un recampament es previst a Montpelhièr lo dissabte 16 de febrièr per maitas organizacions occitanas. Rendetz-vos al Peiron lo tantòst a 2 oras.

(Crèdit fòto: © Wikipedia, Arnaudinvictus)