Lo dissabte 19 d’octobre, dins l’encastre del Festenal Occitania, un collòqui a prepaus de la lenga occitana serà organizat a Albi.
S’i parlarà de l’avenidor de la lenga occitana pel biais de la transmission familhala, de las ajudas balhadas pels poders publics e tot aquò jos l’agach d’Eric Forgues, Director de l’Institut Canadian de Recèrca de las Minoritats Lingüisticas, ICRM.

Vaquí la descripcion balhada pel Festenal Occitania :

Albi en Òc : Colloque « Une politique sociolinguistique pour l’occitan ».

Albi en Òc : una dimenjada per l’occitan
Lo temps d’una dimenjada, venètz imaginar un avenidor per la lenga occitana : un collòqui per pensar, un concèrt per se chalar e una visita per descobrir.

Dissabte 19 d’octobre, sala Athanor, 10h

Collòqui « Una politica sociolingüistica per l’occitan ». Recèrca e concepcion d’una politica sociolingüistica en Miègjorn-Pirenèus, en favor de l’occitan que permeta la subrevida e lo desvolopament de son usatge.
Dempuèi 20 ans, los locutors primaris son a mand de desaparéisser lèu-lèu, la transmission familiala es interrompuda. Pr’aquò assistissèm a una presa de consciéncia per una part significativa de la populacion de l’interès de la lenga e de la cultura occitanas e las collectivitats començan a botar en òbra de politicas publicas. Jos la presidéncia d’Eric Fòrgas, Director de l’Institut Canadian de Recèrca de las Minoritats Lingüisticas, ICRM, lo collòqui deu permetre, en considerant l’avança incontestabla de Canadà en matèria de politica sociolingüistica, de tornar véser las estrategias mesas en plaça per l’occitan e de’n concebre de novèlas.
En prenent ajuda de la coneissença de las comunautas de las lengas oficialas en situacion minoritària al Canadà e en tenent compte de la particularitat del contèxte francés al respècte de las lengas regionalas, Eric Fòrgas, doctor en sociologia e especialista de las lengas minoritàrias, presenta un trabalh d’estudi que deu poder ajudar los actors, institucions e collectivitats pertocadas per la lenga occitana, per elaborar d’estrategias collectivas per tal de menar d’accions qu’asseguraràn la vitalitat de la lenga occitana.
D’autres convidats numeroses que representan las politicas menadas en Occitània, Bretanha, Alsàcia e al País Basc testimoniaràn de lors experiéncias e punts de vista.
Lo matin es vodat a las comunicacions, l’aprèp-dinnar a de grops de trabalh, abans una restituacion en amassada plenièra.

A gratis.
Inscripcions recomandadas.
Reservacion albergament possibla.

Aquel collòqui es organizat ambe la collaboracion de la Comuna d’Albi, lo Conselh General de Tarn, lo Conselh Regional Miègjorn-Pirenèus, lo CCOA, l’IEO de Tarn, l’IEO Miègjorn Pirenèus e l’IEO Federal.

Vos convidem a vos inscriure e a participar an’aquel collòqui !