Aus Sòcis de l’Institut d’Estudis Occitans,

Au moment que las collectivitats apitan projèctes, au servici de la lenga occitana, lo lor sostien a las accions interregionaus de l’IEO que baisha e que hè necèra lo vòste sostien financièr d’aici la fin de l’annada.

(Ad aqueste perpaus, que’vs rebrembam que 60 % de vòstres dons a l’IEOe son deductibles de la vòsta declaracion d’impòsts pr’amor l’IEO es reconeishuda com associacion d’utilitat publica)

Un còp mei, qu’es ua annada cargada per l’IEO que s’acaba. Un punt positiu, IEO Edicions que fonciona : atau, que son 8 libes que seràn estats editats en 2013 (lo darrèr que serà « Une langue en quête d’une nation » de Francesca Zantedeschi au començar de deceme), de la literatura contemporèa de las bonas, libe joenessa, e la fin deu diccionari de Cristian Rapin, que hè aunor a l’investiment de l’autor com a la perseverança de l’IEO dens la soa volontat d’acabar lo tribalh iniciat mei de 20 ans a. 2014 que s’anonça dejà coma ua bona annada, dab ua plega, lo Tot en Un novèla edicion, e d’autas suspresas. Qu’esperam atau editar mei de 10 titols en 2014, contre 1 en 2012… En 2014, que i aurà enqüèra ua asseparacion mei importanta entre las activitats d’edicions (IEO Edicions) e las de difusion/distribucion (IEO Difusion). Que se posicionaram atau dens l’arrespècte de la cordèra deu libe, mes tanben au servici de la difusion/distribucion au sens larg deu libe occitan.

Los projèctes interregionaus, eth, que contunhan.

• Bilingüisme e pichona enfància : document d’informacion sus las animacions en occitan dens las ninoèras qu’es estat editat, e que serà difusat en 2014. Lo site internet navèth, a l’encòp entà informar las familhas de cap a l’interés deu bilinguisme occitan/francés, e centre de ressorças, que serà en linha.
• Fin de la difusion deu document de socializacion “l’Occitan, qu’es aquò ?”, qu’ua ediciona novèla e serà editata en 2014.
• Seguiment deu programa deu labèl « Oc per l’Occitan », de cap a las entrepresas, e tanben de cap a las collectivitats. La labelizacion recenta deu Parc naturau Reginau de lengadòc naut que balha vam aus que tribalha de cotrilha dab los PNRs tà integrar e utilizar l’occitan de faiçon normau dens los territoris concernits. Las informacions pertocant au labèl que son regularament mandadas aus aderents, e tanben aus curios que volen « viver en occitan ».
• Parlesc e Aprenem l’occitan : l’IEO que contunha lo son tribalh de labelizacion deus cors enta’us adultes e d’informacion. Lo labèl Parlesc, qui a per tòca d’organizar la formacion en occitan dab objectius pedagogics que se desvolopa, e los cors balhats per l’IEO que son plan presents.
• Toponimia : l’accion en favor de la toponima que contunha mercés au site
  www.bdtopoc.org
• Centre de Ressorças per la socializacion de la lenga: Servici de l’Emplec e Paginas occitanas
• Obras au Centre Culturau Occitan Rogier Solan
• Revista Anem Occitans ! 4 numèros publicats
• Partenari de :
  – Congrès Permanent de la Lenga Occitana,
  – Coordinacion interlengas dau 31 de març,
  – Rescòntres interregionaus interlengas,
  – NPLD,
  – EBLUL França e ELEN,
  – Clubs Unesco

Solide, totas aquestas accions qu’an un còst ! E qu’avèm dejà soslinhat, la vaduda de navèths utis interregionaus, que l’IEO n’èra a l’origina com lo Congrès Permanent, o l’Ofici public, dens un contèxte de crisi economica, a desvirat ua partida de la moneda publica a d’autas prioritats per las institucions que l’IEO, que l’existéncia e las soas accions renden mei que necèra tà acompanhar, dirigir, e criticar las politicas publicas en cors. Atau, augan, n’i a pas de subvencions de la part de las regions Lengadoc-Rosselhon, Lemosin e Peitau Charanta.

N’i aurà pas nada politica publica eficaça per l’occitan shens organizacions capablas de rebrembar las promessas, los besonhs, e la capacitat de rendér audible la votz de la societat civila occitana. Qu’es lo ròtle de l’IEO, un ròtle que volem deféner dab lo vòste sostien. Atau, qu’es l’ensemble del Conselh d’Administracion de l’IEO e l’equipa deus salariats que vos sollicitam per faire un don a l’IEO en aquesta fin d’annada de 2013 !

Un biais eficaç de desirar avans l’ora una bòna annada 2014 a vòstra associacion per que contunhe de faire totjorn mai avans ambé envam e estrambòrd !

Amistats occitanistas

Pèire Brechet
President de l’IEO
Tolosa (15/11/2013)

- - - -
Los chècs que son a mandar, a l’ordre de l’IEO, a l’adreça seguenta :
IEO, Ostal d’Occitània, 11 Rue Malcousinat, 31000 Toulouse
Un recebut fiscau que’vs serà tornat (60 % que son deductibles de la vosta declaracion d’impòsts)