RESSONS DE L’IEO E D’ENDACÒM MAI MARÇ n° 7

Lo mot del president...

Amb la prima, espelís aqueste novèl numèro dels Ressons que, un còp mai, pòrta un contengut ric que mòstra la vitalitat del moviment de defensa de l’occitan, malgrat l’invisibilizacion sociala qu’es sovent la sieu. Ongan, març, dins l’estat francés, es lo mes de las eleccions municipalas, enjòc màger. L’IEO prepausèt a sas seccions un modèl de letra per mandar als candidats a las municipalas ja que nos sembla que cal que la nòstra federacion pese dins los debats o, almens, ensage d’o far. Sabèm ben, malurosament, que nòstras fòrças son pro limitadas mas es important d’èsser presents e de portar nòstra revendicacion.

Per nosautres, se preparar l’amassada generala federala de l’IEO que, coma ja anoncièrem mai d’un còp, se debanarà los 8 9 10 de mai venents en Juèsa (Joyeuse, en francés), dins lo sud del departament d’Ardecha, a la joncion de tres seccions regionalas de l’IEO, doncas dins un lòc de convergéncia ont nos i cal retrobar fòrça nombroses. O disi cada còp mas es pas unicament un discors: es tras qu’important per nosautres coma per la seccion d’Ardecha de l’IEO e lo cercle local l’Agaram que nos aculhisson e qu’i trabalhan dempuèi lo mes de novembre passat. Que cada seccion i siá presenta per un taulièr, que cada sòci i ane. Comptam sus vosautres totes. Ne trobaretz un preprograma general, un abans tast, dins las paginas d’aquestes Ressons. Trantalhetz pas a nos contactar per ne saber mai. Remembri a aquesta escasença que dos pòstes son per provesir al conselh d’administracion federal de l’IEO e qu’esperam las candidaturas per lo mes d’abril.

Los Ressons nos valon, tot còp, unas reaccions de lectrises e lectors; las e los mercejam fòrça qu’es per nosautres ben important d’aver aqueles retorns. Demest eles, nos arribèt la de Marc Rossèl que dubrís lo talh sus un subjècte que se tractèt lo còp passat e que deu èsser un ais estructurant per l’IEO: la plaça dels joves e la transmission de la lenga. Çò qu’escriu aqueste contributor lèva unas questions que Daidièr Mir i respond dins un «debat» que poiriá venir una rubrica nòva. Es tanben lo ròtle de nòstre bulletin, assumit dempuèi sa creacion, d’èsser un lòc de reflexion, doncas d’escambis, de debats e d’interaccions, dins lo respècte de totes. Dins aquel sens, tota contribucion serà presada.
Coma tanben tot testimoniatge a l’exemple del de Joan Glaudi Babois que nos explica coma descobriguèt l’occitanisme e l’IEO. Totas las experéncias, personalas e collectivas, nos donan, totjorn, a pensar.

Del meteis biais, contunham de demandar de contribucions especificas. Per la prima Jan Mari Caunet, que foguèt temps director de l’IEO en Lemosin, nos presenta l’important trabalh que menèt e mena encara per far entrar l’occitan dins un parc natural regional e de n’assegurar la preséncia coma mejan de socializacion de la lenga mas tanben instrument de pedagogia. Lo remirable trabalh que faguèt amb son equipa poiriá servir de guida per totas las seccions de l’IEO. E, dins los rescontres que Daidièr Mir e ieu fasèm amb las seccions, nos avisam que la question dels parcs naturals regionals (PNR) torna pro sovent. Sabèm, ansin, d’autras seccions, regionalas o departamentalas, especialament en Auvèrnhe Ròse Alps e en Provença Alps que s’i son ensajadas. Dins l’amira nòstra de nos apiejar sus las experiéncias de cadun per ne far aprofeitar totes, me sembla important qu’un grop de trabalh especialament consacrat a aquel tèma, dins l’encastre de la transmission e la socializacion de la lenga, se constituïsca.

Aquò me mena a tornar parlar de las comissions tematicas, associadas al burèu federal de l’IEO, que prepausèri. Per divèrsas rasons, avèm pas pro avançat dins aquesta via. Dins la segonda partida de mon mandat, se las condicions la permeton, serà necessari de passar a la fasa efectiva e operacionala d’aquelas comissions e, encara un còp, fau una crida al volontariat per las integrar. Ja las presentèri mas ne podètz demandar la lista al secretariat se sètz interessats.

Dins la meteissa orientacion, amb lo secretari general de l’IEO, en Daidièr Mir qu’ai ja mençonat adès, contunham nòstres rescontres de las seccions, començats fin de genièr amb las seccions regionalas de l’IEO, puèi perseguits amb quatre novèls rendètz vos amb los responsables d’un desenat de seccions departamentalas. Se los escambis amb los responsables qu’an ben volgut respondre a nòstres convits se passan fòrça ben e son, per nosautres, de moments privilegiats, me dòl de constatar, pasmens, que mens de la mitat de las seccions an respondut als sondatges e messatges reiterats -benlèu tròp nombroses ?- que lancèrem per trobar de datas comunas per organizar de trobadas amb unes pichons gropets de seccions, per tal de favorizar los escambis. Sabèm ben que tot lo monde es subrecargat nosautres, tanben! mas i a un enjòc fondamental d’aver de relacions dirèctas e de nos conéisser totes milhor.

Clavarai en tornant dire çò qu’ai dit en tot començar: dins aquestes Ressons trobaretz unas rubricas e unas informacions variadas, rebats de l’activitat multiforma en favor de nòstras lenga e cultura; vos las daissi descobrir e, espèri, presar. I trobaretz tanben unes omenatges a de personalitats que faguèron viure aquelas lenga e cultura e que nos daissèron recentament. Que çò que faguèron nos servisca per continuar e anar cada còp mai luènh ja que, sens aquò, i aurà pas ren de fait.

Patrici Pojada