Lo DCL tòrna per 2014

Primièr diplòma d’Estat en lenga occitana per adults, lo diplòma de competéncia en lenga (DCL) es obèrt a tot public : salariat, demandaire d’emplec, estagiari de la formacion professionala, estudiant, particular... S’inscriu dins una amira de desvolopament personal o d’inseriment professional.

Per passar lo DCL, inscrivètz-vos en linha abans lo 6 d’abril de 2014.

Estudiatz l’occitan en cors setmanièr, estagi intensiu, per correspondéncia o via internet ?

Coneissètz ja l’occitan e desiratz far valer vòstra competéncia en tant qu’ensenhaire, formator de cors per adults, personal non ensenhant de las escòlas bilingüas o per tota autra amira professionala?

Dins totes aqueles cases, sètz en condicion de passar vòstre diplòma de competéncia en lenga occitana (DCL). L’interés : aquesir una certificacion oficiala segon los critèris del quadre europèu per las lengas. Lo DCL existís per 13 lengas e es accessible sens condicion de nacionalitat, de formacion, o d’activitats professionalas prealablas. Lo DCL certifica la competéncia en lenga de comunicacion dins un usatge social o professional.

Per la session 2014, amb lo sosten de la Region Miègjorn-Pirenèus, 80% dels fraisses d’inscripcion son preses en carga per mantunes perfils de candidats del domeni escolar, para-escolar o de la formacion professionala en occitan (véser lo detalh sul document de presentacion). Notatz tanben que lo DCL, coma diplòma nacional professional, pòt balhar dreit a d’ajudas per la preparacion e l’inscripcion. Informatz-vos alprèp de vòstre emplegaire o de vòstre Pòl emplec.

Per ne saber mai:

• Véser lo sit ministerial del DCL
• S’inscriure
• Un filmòt de 4 mn presenta los enjòcs e las modalitats del diplòma. Lo podètz visionar aicí.
• Telecargatz la plaqueta de presentacion en francés
• Telecargatz la plaqueta de presentacion en occitan

Cossí s’inscriure ?
L’inscripcion es obligatòria sul sit del DCLabans lo 6 d’abril de 2014.

L’examèn se debana lo 23 de mai de 2014 a Tolosa e Milhau.

Formacion lingüistica: mantunes organismes associatius o universitaris prepausan de formacions en lenga occitana. Consultatz http://www.aprenemloccitan.com/. Lo CFPO e l’IEO, en particular, son partenaris del DCL en Miègjorn-Pirenèus.

Contacte (per mai d’informacion) : dcl.occitan@ac-toulouse.fr