Sètz aicí : Acuèlh > Nòstras missions > Centre de ressorgas > Acadèmia de la Lenga Occitana

Acadèmia de la Lenga Occitana

A l’iniciativa de l’Institut d’Estudis Occitans e del Conselh Generau d’Arans, l’Acadèmia de la Lenga Occitana foguèt lançada lo 23 de mai 2008 en Val d’Aran.
La primièra fonccion de l’Acadèmia de la Lenga Occitana serà d’afortirl’unitat de la lenga occitana, sens doblidar de respectar sa diversitat.

Acadèmia de la Lenga Occitana

Per son bon fonccionament, respectarà los principis :

 De representativitat : geografica e dels locutors ,
 De collegialitat de las decisions : los membres de l’Acadèmia seràn tenguts per las decisions que prend collectivament aqueste organisme. Pas acceptar aquesta règla seriá tornar metre en question lo principi fondator de l’organisme, e doncas ne pas mai ne far partida,
 De la difusion de l’informacion : gràcias a supòrts de vulgarizacion e supòrts tecnics,
 De la reconéissença : l’Acadèmia de la Lenga Occitana installada serà un interlocutor dels poders politics que se voldràn actors dins lo domèni de la lenga, a començar per las collectivitats dels territòris ont se parla occitan. Las Regions occitanas seràn membres de l’Acadèmia.

L’Acadèmia de la Lenga Occitana serà compausada de 50 membres que formaràn lo conselh plenièr. La comission permanenta scientifica e tecnica serà una còla de 15 personas elegida pel conselh.

Totes aqueles principis foguèron aprovats per l’ensèm dels participants de l’acamp del 23 de mai de 2008. Un tèxt d’acòrdi foguèt signatont s’engatja cada partenari a formar l’Acadèmia de la Lenga Occitana segon los principis e l’esquèma aprovat per l’ensèm dels participants, a nomar un o mai d’un representants dins l’Acadèmia e a mandatar aqueste(s) per participar al primièr acamp de trabalh de l’Acadèmia de la Lenga Occitana.

Foguèt tanben dicidit d’amassar un grop de trabalh per prepausar una forma juridica adaptada per portar l’Acadèmia. Aqueste grop tecnic s’es acampat a Rodés lo 23 de julhet de 2008 e decidiguèt de crear oficialament una associacion de prefiguracion, supòrt de l’Acadèmia, lo 17 de novembre de 2008 a l’Ostal de Region Aquitània a Bordèu. Per plan desseparar los ròtles, los membres de l’associacion de prefiguracion podràn pas èsser membres del Conselh Plenièr de l’Acadèmia de la Lenga Occitana.

D’un autre costat la Region Lengadòc Rosselhon e la Confederacion de las Escòlas Calandreta qu’avián pas participat a l’acamp de mesa en plaça de l’Acadèmia de la Lenga Occitana an decidit elas tanben de participar al projècte.

L’associacion de prefiguracion de l’Acadèmia de la Lenga Occitana recrutarà un encargat de mission dins lo tresen trimèstre de 2009.

Lo projècte foguèt presentat per Francesc Boya, Sindic d’Aran, e David Grosclaude, President de l’Institut d’Estudis Occitans.

An participat a la primièra amassada del 23 de mai de 2008 : representants de las Regions Aquitània (René Ricarrère), Mieidia Pirenèus (Rémy Pech), PACA (Catherine Lecoq), de la Generalitat de Catalonha (Paquita Sanvincén) ; Margalida Tous Ferrer, directritz Generala de Politica Lingüistica de las isclas Balearas que representava lo president de l’Eurò-Region Pirenèus Mediterranèa Francesc Antich, President de las Isclas Balearas ; Jean Salles-Loustau, Inspector General de las Lengas de França ; Patrick Sauzet per l’Univeristat Tolosa Miralh ; Guy Latry per l’Universitat Bordèu III ; PatriciaHeiniger-Casteret per l’Universitat de Pau ; Christian Bonnet per l’Universitat de Clarmont d’Auvernha II ; Jòrdi Suils per l’Universitat de Lleida ; Jep Montoya per l’Institut d’Estudis Aranés ; Joan Eygun per los editors occitans ; Marcèu Esquieu per los artistes occitans ; mantunes representants de l’ensenhament del Val d’Aran ; e mantunes membres del CA de l’IEO.

Lire la page en français
Portfòlio de l'article