La situacion de l’IEO

La disparicion progressiva de las ajudas de las regions Novèla-Aquitània e Occitania-Pireneus-Mediterranèa desempuèi la creacion de l’Ofici public de la lenga occitana a entraïnat un deficit de l’IEO tal que lo manten del pòste de director de l’IEO era financierament pas mai possible. Laurenç Gosset, qu’ocupava aquel pòste desempuèi un desenat d’annadas, a alavètz damandat una rompedura convencionala de son contract de trabalh amb presa efectiva al 30 de setembre venent, çò que lo CA de l’IEO a acceptat.

La consequéncia per l’IEO es dobla : d’un costat, la disparicion de las cargas financièras del salari del director – lo sol emplegat de l’IEO – permet a l’IEO de limitar son deficit budgetari. D’un autre costat, priva l’IEO de l’activitat que menava lo director, tant a l’IEO nacional qu’a l’IDECO, lo sector edicion e difusion de l’IEO. Alavètz, al 30 de setembre, l’anament de l’IEO repausará sonque sul benevolat, çò qu’es un escomesa de las bèlas.

Lo bureu e lo CA de l’IEO nacional se recampèron a Tolosa le 4 de setembre passat per veire cossí enfaciar la situacion e assegurar la continuitat, al mens a minima, de las activitats fondamentalas de l’IEO, que lor mantenença es de primièra importància. Dins aquela amira, lo CA actual considera que son ròtle primièr es d’assegurar una « gestion tecnica » de l’IEO nacional. Gràcia a l’implicacion dels membres del bureu e del CA qu’an acceptat de prendre en carga una part suplementària de trabalh benevòl, las activitats de l’IEO que lo CA considera coma fondamental de manténer – activitat d’edicion e de difusion, secretariat, representacion de l’IEO dins las instàncias nacionalas e internacionalas de defensa de las lengas regionalas – van poder èsser mantenidas, al mens a cort tèrme. Vos presentam aquí los elements essencials de las activitats de l’IEO, per las qualas l’implicacion de personas novèlas es bevenguda, que totas las bonas volontats serán pas de manca.

Se las decisions del CA permeton una continuitat tecnica de l’activitat de l’associacion, la perennitat de l’IEO nacional requesís de faiçon imperativa l’implicacion de personas novèlas e la definicion d’un projecte novèl. Aquò serà l’escomesa de l’Amassada generala, que la crisi sanitària a forçat de reportar, e que se debanarà al mes d’octobre, emai la situacion sanitària ne’n facilita pas l’organizacion. Per totas aquelas rasons, l’amassada generala 2021 – annada d’eleccion d’un conselh d’administracion novèl – es particularament importanta per l’avenir de l’IEO nacional.

IEO-edicion e IEO difusion a Puèglaurenç

L’IEO a una activitat d’edicion e de difusion de la literatua occitana recampada dins l’estructura IDECO, un establiment que fa partida de l’IEO e qu’es localizat a Puèglaurenç, dins Tarn, ont l’IEO es proprietari d’un bastiment industrial. Lo trabalh d’edicion, fach principalament a distància, necessita una diversitat de competéncias e d’activitats – l’evaluacion de la qualitat dels manuscrichs recebuts e las relacions amb los autors, la correccion, la mesa en pagina e lo maquetatge dels textes, la redaccion dels contracts d’edicion, la preparacion e la budgetizacion del plan d’edicion, las relacions amb las estampariás, la comptabilitat e la comercializacion, que las ventas son l’essencial de las entradas d’argent.

La gestion de las ventas es la part d’activitat de l’IEO Difusion, que s’ocupa non solament de la comercializacion dels libres editats per l’IEO Edicions, mas tanben de libres d’autres editors, notadament de seccions de l’IEO, al prep dels profesionals de la filièra dels libres, e directament al public per la venta per internet o dins d’eveniments culturals. Las comandas son tractadas un còp per setmana al local de Puèglaurenç, e la continuitat d’aquela activitat es indispensabla. L’IEO Difusion es tanben las relacions amb los editors difusats d’un costat, e los libraris, professionals o associatius.

Amb la partença del director, l’activitat d’edicion e de difusion repausan sul trabalh de benevòles. Totun, per l’IEO Difusion, doas salariadas de l’IEO de Tarn intervenon per assegurar la recepcion, lo mandadís e las facturacion de las comandas e la comptabilitat. Aquel trabalh, remunerat en prestacion de servici a l’IEO de Tarn, permet un seguiment setmanièr de las comandas que ne pòt pas dependre sonque de benevòls.

L’IEO nacional a Tolosa

L’IEO nacional dispausa d’un burèu a Tolosa situat dins l’Ostal d’Occitania. Dins la situacion actuala, lo prètzfach del CA es d’assegurar l’activitat essenciala de secretariat, de comptabilitat e de relacions amb las diferentas seccions afiliadas a l’IEO. Amb la parténça del director e en esperar la constitucion d’una còla novela, lo burèu de l’IEO assegura de faiçon collectiva las responsas als corriers electronics e a las sonadas telefonicas, mai si, amb la partença del director, lor tractament será dependent de las disponibilitats dels benevòls del burèu. La contribucion d’un salariat a temps parcial será a estudiar en foncion de la situacion financièra de l’associacion.

Un punt important es la plaça de l’IEO dins los collectius e las organizacions nacionalas e internacionalas de defensa de las lengas regionalas e minorizadas. L’IEO es desempuèi d’annadas membre de l’organizacion europèa ELEN (European language equality network) e de sa seccion francesa, e de l’estructura europèa NPLD (Network to promote language diversity). L’IEO es de mai membre el collectiu « Pour que vivent nos langues ». Pel moment, es lo president qu’assegura la representacion de l’IEO dins aquelas estructuras, mai si d’autras personas pòdon èsser mandatadas pel CA o pel burèu per representar l’associacion. L’IEO es tanben membre de l’UNESCO. Lo CA considera qu’es lo ròtle de l’IEO de contunhar a participar a aquelas organizacions, mas la participacion efectiva necessita la disponibilitat de benevòls.

La revista Anem Occitans ! e la comunicacion alprèp dels aderents

La revista de l’IEO Anem Occitans !, es, amb lo mandadís electronic de letras d’informacion e lo site internet de l’associacion, un mejan important de comunicacion de cap als aderents sus l’activitat de l’associacion e d’informacion sus la lenga e la cultura occitanas dins sa diversitat territoriala. La situacion financièra precària de l’IEO, mai las perturbacions del foncionament de l’associacion dempuèi la crisi sanitària, an agut coma consequéncia la suspension de la parucion de la revista. Pel moment, los membres del CA e del burèu an pas la disponibilitat necessària per tornar assegurar aquela parucion. La remesa en rota de la revista repausa sus la constitucion d’una còla redactritz – l’activitat de mesa en pagina pòt èsser mutualizada amb l’IEO edicion, qu’utiliza las meteissas aplicacions de mesa en pagina – que, pel moment, fa manca.

La situacion financièra

Lo rapòrt financièr (bilanç e compte d’activitat) detalhat de l’IEO de la darrièra l’annada clavada (2020) serà presentat e sosmés a votacion, amb lo rapòrt d’activitat, a l’AG. Donam aquí un resumit de l’activitat financièra de l’IEO, amb las chifras de cargas e produchs, la diferéncia correspondant al benefici o al deficit de l’annada. Las activitats de l’IEO son, comptablament, desseparadas entre l’IEO-IDECO – qu’es una activitat comerciala – e las autras activitats, « federalas » – non comercialas. Los comptes son doncas presentats separadament, e tanben regropats, correspondent a l’activitat de l’associacion IEO dins son entièr.

IEO-IDECO (edicion e difusion)
Produchs : 38374,88 € (2019 : 39658,04 €)
Cargas : 41591,44 € (2019 : 30352,38 €)
deficit : -3216,56 € (2019 : benefici : +9305,66 €)

IEO “federal” (activitats non comercialas)
Produchs : 53876,45 € (2019 : 64734,62 €)
Cargas : 74546,96 € (2019 : 68742,74 €)
deficit : -20670,51 € (2019 : deficit : -4008,12 €)

IEO (activitats comercialas e non comercialas)
Produchs : 92251,33 € (2019 : 99570,66 €)
Cargas : 116138,40 € (2019 : 98589,47 €)
deficit : -23887,07 € (2019 : benefici : +981,19 €)
 
Lo Conselh d’administracion de l’IEO