Lo projècte Cantem òc
Lo projècte « Cantem òc ! » desvolopat per l’Institut d’Estudis Occitans qu’a per tòca d’aviar ua dinamica collectiva e panoccitana a l’entorn deu cant occitan.
Que i a dinamicas dens quauques parçans d’Occitania a l’entorn deu cant mès pas sus l’ensemble deu territòri. De mei la conéishença deus estiles musicaus e deus repertòris de las autas regions occitanas qu’ei sovent plan limitada.
La purmèra accion d’aqueste projècte que’s debanè en 2009 e qu’avó per tòca de har cantar 10 cants occitans a mainatges e adultes de tota l’Occitania, tots amassa lo 24 d’octobre de 2009 a Carcassona.
Pascal Caumont, cantaire e musician occitan, professor de musica au Conservatòri de Musica de l’Aglomeracion de Tarba qu’estó lo conselhèr artistic deu projècte.
Un CD d’aprentissatge qu’estó realizat dab la participacion de cantaires occitans. Que presenta cants de diferentas regions occitanas (Carcin, Gasconha, Vesubia, Aubrac, Perigòrd, La Gàrdia, Marselha, Coserans) dab las diferentas votz taus cants polifonics. Aqueths cants qu’estón enregistrats per Guilhèm Lopez, Matèu Baudoin, Danièla Franzin e Thierry Cornillon, Tres Votz, Joan-Loís Deygas e Ives Portefaix, Los Zinzonaires, Aire de Prima, Manu Théron e lo Còr dau Lamparò, Renat Sette, Bastien Glacet.
Aqueth CD qu’estó difusat a 900 exemplars.
De mei mantuas repeticions encadradas per cantaires competents qu’estón organizadas dens un vintenat de vilatges o vilas. Qu’i participèn a l’entorn de 300 personas.
