Accueil > L’IEO en français > Actualités > La justícia confirma l’interdiccion de s’exprimir dins una autra lenga que (…)

La justícia confirma l’interdiccion de s’exprimir dins una autra lenga que lo francés dins una assemblada

samedi 30 novembre 2024, par adminieo

Toutes les versions de cet article : [français] [français]

La lenga de la Republica es lo francés.

Aqueste article 2 de la Constitucion, segon la Cort administrativa d’apelacion de Marselha, interdís l’usatge d’una autra lenga dins los debats d’una assemblada deliberativa d’una collectivitat.

Inconstitucionalitat

Aquesta afaire es lo darrièr (e probablament pas lo darrièr) episòdi del conflicte entre los elegits de la Collectivitat de Corsega e lo prefècte. En 2022, aqueste demandèt l’anullacion de dos actes adoptats per l’Assemblada de Corsega e lo Conselh executiu. Aquestes actes modificavan lo reglament interior d’aquestas assembladas en i integrant la frasa seguenta : « Las lengas dels debats (…) son lo còrse e lo francés ». De mai, lo Conselh executiu aviá decidit que sos membres e sos agents « utilizen las lengas còrsa e francesa dins lors escambis orals, electronics e dins los actes que resultan de lors trabalhs ».

Hors de question, jutja lo prefècte, que atacèt aquestas decisions davant lo tribunal administratiu de Bastia – que li donèt rason en jutjant que aquesta règla contraven a l’article 2 de la Constitucion.

La collectivitat còrsa faguèt apelacion d’aqueste jutjament davant la Cort administrativa d’apelacion (CAA) de Marselha. Defendèt que, d’una part, aquestas disposicions impausan pas l’usatge de la lenga còrsa, mas lo rendon solament possible. E que, d’autra part, l’article 75-1 de la Constitucion establís que « las lengas regionalas fan partida del patrimòni de França ».

La CAA de Marselha se mostrèt pas sensibla a aquestas arguments. Ramenta que l’article 2 de la Constitucion implica que « l’usatge del francés s’impausa a las personas moralas de drech public ». L’article 75-1 pòt pas èsser invocat, d’un costat perque « establís pas un drech o una libertat que la Constitucion garantís », e d’autre costat perque s’aplica pas qu’a condicion que las exigéncias de l’article 2 sián « respectadas ».

Lo reglament interior adoptat per l’Assemblada de Corsega conferís als membres « lo drech de s’exprimir, en sesilha d’aquesta assemblada, dins una lenga autre que lo francés ». Quitament se aquestas disposicions « impausan pas l’usatge exclusiu d’una lenga diferenta del francés », mas l’autorizan solament, son doncas contràrias a la Constitucion.

Efièch retroactiu

De mai, la collectivitat demandèt davant la CAA, se l’anullacion de sas decisions èra confirmada, una « modulacion dins lo temps », d’almens sièis meses. Considerava que aquesta anullacion poiriá entraïnar de consequéncias « manifestament excessivas », en particular l’anullacion retroactiva de totas las decisions presas per l’Assemblada sota aqueste reglament interior, especialament los actes budgetaris. Aqueste argument convencèt pas los jutges de la CAA, la collectivitat « justifiquèt pas ni quitament al·leguèt que las mesuras en question serián estadas adoptadas aprèp de debats menats integralament o principalament en lenga còrsa, o redigidas dins aquesta lenga ». La Collectivitat de Corsega es doncas pas fondada a demandar una modulacion dels efièches dins lo temps d’aquesta anullacion.

La CAA confirmèt doncas l’interdiccion de s’exprimir en lenga còrsa dins l’Assemblada e lo Conselh executiu de Corsega – e sos arguments fan comprendre qu’una tala interdiccion s’aplica a totas las lengas regionalas dins totas las assembladas de las collectivitats territorialas.

Los presidents de l’Assemblada e del Conselh executiu manifestèron lor volontat de contestar aqueste jutjament davant lo Conselh d’Estat, en indicant que sembla « contrari als tèxtes europèus e internacionals que protegisson los dreches fondamentals al nivèl lingüistic ». Sentent una manca d’optimisme sus aquesta démarche, envisatjan ja de portar lo dorsièr davant las « juridiccions europèas e internacionalas ». Lo combat juridic sembla doncas encara luènh d’èsser acabat.


Voir en ligne : Maire-infoLe quotidien d’information des élus locaux

Portfolio

Un message, un commentaire ?

Forum sur abonnement

Pour participer à ce forum, vous devez vous enregistrer au préalable. Merci d’indiquer ci-dessous l’identifiant personnel qui vous a été fourni. Si vous n’êtes pas enregistré, vous devez vous inscrire.