Aquel tèxt foguèt mandat als aderents de l’IEO amb lo convit e lo programa de l’Amassada Generala de 2010 a Limòtges.

L’IEO, una Federacion !
Mai de qu’es una Federacion ?

 

1 – Un estatut legau :
D’en promier, de segur, es un estatut juridic administratiu, definit dins nòstreis estatuts pròpris que precison son biais de foncionnar.
Estatuts adoptats definitivament en 2008 e que definisson precisament leis amiras e lei tòcas de l’associacion :
« …Elle a pour objet de
– définir les orientations générales et le programme d’action collectif,
– d’assurer la coordination entre les associations membres,
– d’être l’interlocuteur unique auprès des autorités et organismes de niveau national ou international,
– d’offrir des services,
– d’apporter éventuellement assistance aux associations affiliées,
– d’assurer les services et les missions communes nécessaires aux buts de la fédération et de ses membres.»

2 – Un estat d’esperit :
Un estat d’esperit per
– aderir an aquesteis estatuts, e signar la carta federativa de l’IEO,
– aver consciéncia de faire partida d’una estructura que passa lo locau, lo terren de proximitat… e qu’aquò pòu èstre una ajuda e non pas una dificultat de mai,
– se dubrir ais autres ; acceptar d’obrar en cooperacion, d’unir lei fòrças per d’objèctius communs ; se voguer e se sentir solidaris…
– fargar de liames entre leis aderents, lei seccions… per trabalhar sus de projèctes comuns amb una eficacitat maximom,
– comunicar, escambiar, partejar leis experiéncias, lei capitadas bònas e encara mai lei marridas qu’ajudan sovent a progressar…
– veire que son lei problèmas e ne’n trobar lei solucions dins lo dialòg e la serenitat…
– au finau, faire avans toteis ensems!

Es un biais de foncionar qu’es pas tojorn aisat, que s’apren ambé lo temps, de paciéncia e de bòna volontat…

3 – Un biais de faire :
Perqué trabalhar en interregionalitat ? Quin interès d’obrar cotria per de projèctes comuns a tot l’espandi occitan ?
Se volèm que nòstra lenga ague un avenidor e sigue considerada non pas coma un gadget folcloric pintoresc de quauquei pichòts terraires mai coma una lenga ordinària, otis d’escambis e de comunicacion de tot un espandi, rebat e resson d’una realitat sociala e economica, fau que lo monde la rescontre au quotidian e l’identifique de Niça a Bordèu e de Gueret a Mediterranèa.
Fau que la lenga s’ausisse, se vegue, se legisse… s’escrive ! De lònga e d’en pertot !
Alora, serem pres au seriós .

Segur, cadun dins son relarg prepausa au public d’activitats de proximitat (cors, ataliers, conferéncias, mòstras, espetacles, concerts, balètis… literatura, etc), totei causas pron importantas puei qu’asseguran una preséncia de la lenga e van au rescòntre dau monde…
Mai sabèm totei qu’aquò basta pas…
Que son de moments de lenga, mai que nos fau capitar de faire sortir l’occitan per carrieras…

Es dins aquesta amira que l’IEO a entraïnat despuei quauqueis annadas de projèctes interregionaus (cors per adultes, labèl Oc per l’Occitan, toponimia e senhalizacion bilingua…) e que demanda en totei de l’i participar que se volèm èstre eficaç fau que lei membres e lei seccions jògan lo juec.

D’autra part, fau que l’IEO federau ague una vision globala de l’accion de l’associacion sus tot lo territòri per ne’n veire lei fòrças e lei flaquesas e posquer jogar son ròtle de federator : sostenir e ajudar leis uns, aprofiechar dei boni de l’experiéncia deis autres e lei repercutir ; tirar lei leiçons dau «ja fach» per programar çò qu’es «de faire».
Una bòna coordinacion permete en cadun de mens gastar de temps e d’energia, de pas tornar inventar la ròda a cada còp…
Aqueste ròtle de federator, de coordinator necessita que lei membres e lei seccions respècton e aplican la «Carta de la Federacion» que siguèt votada a l’AG de Marselha en 2009.

Melhorar la coesion de l’IEO permetrà d’aumentar sa visibilitat, sa credibilitat, son ròtle d’operator linguistic e culturau, de fòrça de proposicion per faire avans… d’èstre percebuts coma una fòrça de pression de mai en mai importanta çò que pòu qu’èstre benefic en totei.

Podèm pas revendicar una politica linguistica interregionala e demorar replegats sus nòstre canton.

De segur la geografia occitana fa que nos fau prendre en còmpte la diversitat regionala sus l’espaci occitan. Mai tanben fau ben veire que l’IEO quita pas de demandar dempuèi d’annadas que sigue mesa en plaça una politica lingüistica per l’occitan coordonada.

Donc devèm absoludament poder aver un IEO en capacitat de discutir ambé d’un costat l’Estat e d’un autre costat de collectivitats que començan pauc a pauc a metre en plaça una politica comuna.

Se prenem de retard sus aqueu movement l’IEO risca d’èstre pas mai un interlocutor pertinent per lei poders publics.

Per exemple, l’IEO a participat d’un biais fòrça actiu a la mesa en plaça d’una coordinacion entre lei diferentas lengas de França e aquò pr’amor aviá un imatge de representant d’un grand territòri e de regions diferentas e nombrosas.

Es donc capitau d’aver un IEO coordonat.
Nos fau absoludament laissar coma un element dau passat lo fach de se «maufisar» a priòri de l’estructura federala coma se siguèsse un element centralizator.

Avèm agut sovent de reaccions cap a l’IEO Nacionau qu’èran quasi epidermicas subretot quand l’IEO Nacionau (ambé son CA compausat de militants de basa dei diferentas regions e dei diferents territòris, o fau pas jamai oblidar) fasiá de remarcas sus lo foncionament ò sus lo non foncionament de tau ò tau IEO despartamentau ò regionau.

Es arribat que d’unei metèsson mai d’energia a contestar lei remarcas de l’IEO nacionau qu’a dialogar ambé lo CA per trobar una solucion concertada.

Sovent sembla que siam totei mai o mens formatats per l’imatge dau poder politic tau coma es en França e que donc sigue considerat coma un acte «occitanista» de contestar l’IEO «centrau».

Faire de l’IEO una federacion es faire que cada element es au servici de l’ensemble e que l’ensemble es au servici de cada element. Mai fau establir de règlas comunas de foncionament e lei fau respectar.

Fins ara lo director de l’IEO a totjorn agut de la part dau CA Nacionau coma demanda de cercar a ajudar leis diferentas associacions. O a fach.
Se pòt pas contestar lo drech dau CA de l’IEO nacionau a faire de remarcas e a se preocupar dau disfoncionament d’unei seccions regionalas quand n’i a. Es son trabalh pr’amor es elegit per un acamp generau de l’IEO que dona d’orientacions, que definís çò qu’es d’èstre a l’IEO.

Enfin fau pas demembrar qu’en 10 ans l’IEO s’es estructurat e a permés a sei seccions regionalas e despartamentalas de dispausar de mejans suplementaris. L’estructuracion s’es acompanhada de la preséncia mai importanta de professionaus dins l’estructura de l’IEO nacionau e tanben deis IEO regionaus e despartamentaus.

Se pòt citar mantuneis exemples d’aisinas concretas e tanben la participacion e l’implicacion importanta de l’IEO e la mobilizacion istorica que siguèron lei tres manifestacions Anem Òc !

Ana-Maria Poggio
Vici-presidenta de l’IEO