La version 2010 de l’Occitan qu’es aquò sortís oficialament per l’Estivada de Rodés (12), lo 28 de julhet. Lo document comprend l’annuari del labèl Òc per l’occitan, lo labèl dels professionals que valorizan la lenga dins la vida economica.

La presentacion publica del document se farà sus l’espaci IEO a l’Estivada de Rodés, lo dimècres 28 de julhet a 18 h.

Editat a 130 000 exemplars, lo document agratís s’adreiça al grand public dins son format A5 de 84 paginas, publicat en francés, anglés, castelhan. 2 en 1, compren l’Occitan ques aquò e l’annuari del labèl Òc per l’occitan.

 

Amb l’Occitan qu’es aquò, ne podètz saupre mai sus la lenga e la cultura occitanas. Son 30 paginas d’informacions que vos balharàn las claus per legir e prononciar l’occitan coma cal, apréner qualques frasas essencialas per se petassar dins la lenga, legir e cantar lo Se Canta amb sa traduccion, e ne saupre mai tanben sus la lenga e l’istòria occitana, sos personatges màgers, sa creacion artistica e literària, sos medias…

La partida Òc per l’occitan, l’annuari del labèl del meteis nom, recampa mai de 180 professionals referenciats dins Occitània tota, qu’emplegan e fan viure la lenga dins la vida economica. Aqueste document es de bon utilizar per trapar las adreiças bonas e far de crompas o de torisme en occitan.

Aquel document es agratís. Podètz comandar o venir cercar d’exemplaris per vautres o per lo difusar en çò vòstre.

A L’IEO : l’Ostal d’Occitània, 11 carrièra Malcosinat, 31000 Tolosa.
A l’Estivada de Rodés de 2010 (del 27 al 31 de julhet) sus l’Espaci IEO, Rodés (12).

Podèm tanben ne vos mandar per corrièr pòsta.

Document de bon trapar alprèp dels labellizats Òc per l’occitan, dins un fum d’oficis de torisme e dins las seccions de l’IEO, tre agost de 2010.