Volontariat per l’occitan es organizat per l’Institut d’Estudis Occitans. Coma lo Volontariat per Aranés, a per tòca la mesa en relacion d’un "Volontari" es a dire una persona que mestreja l’occitan correntament, amb un "Aprenent" es a dire qualqu’un que sap las basas de l’occitan e que vòl préner d’assegurança.

Sufís d’aver una ora per setmana de liura pendent 10 setmanas.
Per un Aprenent, vos permetrà de vos assegurar dins la vòstra practica de l’occitan, d’aquesir un occitan mai corrent e alargar las vòstras coneissenças culturalas.
Se sètz Volontari, vos donarà una escasença mai de practicar la lenga e de partejar las vòstras coneissenças. Tot aquò dins un encastre ludic, fòra d’un quadre de cors e dins un luòc agradiu.

 

Qual pòt participar?
Los Volontaris son de personas majoras que parlan occitan correntament. Cap certificacion en lenga es necessària, sonque l’enveja de partejar sa coneissença de la lenga, fòra d’un encastre professoral.
Los aprenents son de personas majoras qu’an una coneissença basica de l’occitan e qu’an enveja de ganhar mai d’assegurança, mai de fluiditat e ne far una lenga mai presenta dins sa vida de cada jorn.

Cada inscrit s’engatja a respectar lo còde de bonas practicas

– S’inscriure coma Aprenent
– S’inscriure coma Volontari

Detalhs practics
Aprenents e Volontaris se retròban en binòmi 1 h per setmana dins un endret que causisson, pendent 10 setmanas de seguida :
Dempuèi la setmana del 3 de genièr 2011 fins a la setmana del 13 de març 2011.
A partir de l’inscripcion de cadun, l’IEO forma los “parelhs linguistics”que se retrobaràn puèi per charrar, en foncion de las disponibilitats donadas e de las afinitats.

L’inscripcion per participar es gratuita.

Un còp inscrit vos comunicarem las coordonadas del vòstre binòmi. Será a vos de lo contactar per veire amb el lo primièr rendètz-vos.

Ont se passa?
Los participants son liures de se retrobar ont vòlon. Al moment de l’inscripcion, vos cal precisar un luòc de rescontre. Per aquò de luòcs son partenaris de l’operacion. Son d’endrets dubèrts al public ont vos podètz retrobar : bars, bibliotècas, salas associativas, etc. qu’an una activitat de sosten de la lenga occitana. La lista d’aqueles luòcs es mesa a jorn regularament amb las adreiças e los oraris de dubertura.

Afficher luòcs Volontariat per l’occitan 2011 sur une carte plus grande

Se pòt tanben far per telefona se las personas son luènh o isoladas, mas notatz qu’es mai dificil per un aprenent de menar una convèrsa al telefòne.
Se podètz pas veire la mapa, clicatz aquí

S’inscriure coma luòc partenari per aculhir de parelhs Volontaris/aprenent

De qué parlar?
De tot çò que vos agrada : espòrt, literatura, cultura generala, actualitat, filmes, viatges, cosina, vida familiala, los vòstres projèctes, lo temps passat, lo temps futur, lo vòstre mestièr, cossí anatz, ont vivètz, etc.
Suggerissèm als volontaris de privilegiar la fluiditat de la lenga a la correccion : interrompatz pas l’Aprenent. Ensajatz de li far compréner son error en tornant formular son dire pel biais d’una question.

Podètz tanben :

– Anar visitar amassa un luòc
– Parlar a l’entorn d’un supòrt (jornal, site internet, tèxte…)
– Anar far los magazins amassa.
– Practicar una activitat (esportiva o ludica)

E après?:
A la fin del programa de las 10 setmanas de convèrsa, de recampaments dels participants son organizats dins diferents endrets, lo dissabte 26 de mars. Vos comunicarem mai de detalhs suls recampaments mai pròches d’en çò vòstre.

Contact :
Institut d’Estudis Occitans (Cecila Chapduelh),
11 carrièra Malcosinat,
31000 Tolosa,
05 34 44 97 11,
volontariat@ieo-oc.org.

formulari Volontari

Formulari Aprenent

Code de bonas practicas