Un diplòme d’estat per atestar de sas capacitats en occitan
Lo ministèri francés de l’ensenhament a creat recentament lo DCL (Diplòma de Competéncia en Lenga). Existissiá fins ara per las lengas estrangièras, puèi s’es creat lo DCL breton e darrièrament lo DCL occitan. S’adreça en primièr lòc a totes los que vòlon far valer lor coneissença de l’occitan dins l’encastre professional. Es dobèrt a totes, quines que sián lo nivèl de lenga e d’estudis.
En tant qu’organizacion màger de corses als adultes, L’Institut d’Estudis Occitans a portat sa contribucion dins l’elaboracion d’aquel diplòma. Serà l’escasença de far certificar un vertadièr nivèl de lenga d’un biais interactiu. Totas las competéncias comunicativas son presas en compte : escota, produccion orala, prene part a una convèrsa, legir, comprene e argumentar. Serà doncas per cada aprenent que seguís un cors per adulte o per un ensenhaire un biais oficial de certificar los aquesits.
Cadun podrà aital far reconéisser son nivèl de lenga quitament sens aver fait cap estudi especific. La primièra session oficiala se farà lo dissabte 21 de mai 2011 dins las acadèmias de Bordèu, Tolosa e Montpelhièr e una session experimentala se farà lo 5 de febrièr 2011.
Cossí se debana lo DCL ?
L’examen se passa amb una espròva d’una durada de 2 oras 30, presentada jos la forma d’un jòc de ròtle : lo candidat es cargat d’una mission ont li caldrà far una causida e la justificar. Lo candidat legís, escota, s’entreten amb un interlocutor, tracta l’informacion e escriu un document de sintèsi. L’espròva caup cinc fasas : Presa d’informacions dins de documents escrits, presa d’informacions dins de documents sonòrs, entreten telefonic (presentacion orala a un interlocutor e entreten complementari), redaccion d’un document per explicar e argumentar sa causida.
Aprèp l’espròva, una jurada atèsta lo nivèl obtengut pel candidat. 5 grases son possibles, en referéncia al CECRL (Cadre Europèu Comun de Referéncia per las Lengas) : nivèl A2 / nivèl B1 / nivèl B1+/ nivèl B2 / nivèl C1.La session experimentala
L’equipa de concepcion vos convida a vos inscriure coma candidat, gratuïtament , a aquela session experimentala. La vòstra preséncia serà plan utila per poder finalizar la concepcion del diplòma. De mai, poiretz recebre una atestacion de vòstre nivèl al cap de l’espròva.Inscripcion dins la limita de las plaças disponibles al prèp de
Jeanmarie.Sarpoulet@ac-bordeaux.fr per l’acadèmia de Bordèu.
Marie-Jose.Villeneuve@ac-montpellier.fr per l’acadèmia de Montpelhièr.
Didier.Agar@ac-toulouse.fr per l’acadèmia de Tolosa.Per mai de detalhs sul DCL e lo butletin d’inscripcion.
