Dins d’unas comunicacions de l’IEO, es fach referéncia al Cadre Europenc Commun de Réferéncia per las Lengas (CECRL). Un article per ne saupre mai suls sièis nivèls de competéncias en occitan o dins tota autra lenga viva d’Euròpa que se trapa jos aquestas nommadas A1, A2, B1,…. C2).

Lo Cadre Europenc Commun de Referéncia per las Lengas ofrís una basa comuna per l’elaboracion de programas de lengas vivas, de referencials, d’examèns, de manuals, etc en Euròpa.
Descriu çò que los aprenents d’una lenga dèvon aprener per tal de l’utilizar dins l’amira de comunicar d’un biais eficaç. Aquò comprend tanben la conesissénça del contèxt cultural que sosten la lenga.
Enfin, lo Cadre de referencia definís los nivèls de competéncia que permeton de mesurar los progrèsses de l’aprenent.

 

Un cadre de referéncia en sièis nivèls

A- Utilisator elementari

A1- Lo nivèl introductiu o descobèrta.
L’estudiant pòt comprene e utilizar d’expressions familiaras atal coma d’enonciats plan simples per repsondre a d’afars concrets. Pòt se presentar o presentar qualqu’un e pausar a una persona de questions que la concernisson- per exemple sus ont demora, sas relacions, çò que li aparten, etc.- e pòt respondre al meteis tipe de questions. Pòt comunicar d’un biais simple se l’interlocutor parla lentament e clarament e se mòstra cooperatiu.

A2- Lo Nivèl intermediari o de subrevida.
L’estudiant pòt comprene de frasas isoladas e d’expressions corentament utilizadas en relación amb de domènis immediats de prioritat (per exemple, informacions personalas e familialas simplas, crompas, environa pròcha, trabalh). Pòt comunicar per de tascas simplas e costumièras que demandan pas qu’un escambi d’informacions simplas e directas sus de subjèctes familiars e usuals. Pòt descriure amb de mejans simples sa formacion, son environa pròcha e evocar de subjèctes que correspondan a de besonhs immediats.

B- Utilisator independent

B1- Lo nivèl lindal.
L’estudiant pòt comprene los punts essencials quand un lengatge clar e estandard es utilizat e se s’agís de causas familiaras dins lo trabalh, a l’escòla, dins los lésers, etc. Pòt se petassar dins la màger part de las situacions encontradas en viatge dins una región ont la lenga cibla es parlada. Pòt producir un discors simple e coerent sus de subjèctes familiars dins los sieus domènis d’interèst. Pòt contar un eveniment, un experiment o un sòmi, descriure un espèr o una tòca e expausar d’un biais briu de rasons o d’explicas per un projècte o una idèia.

B2- Lo nivèl avançat o utilisator independent.
L’estudiant pòt comprene lo contengut essencial de de subjèctes concrèts o abstracts dins un tèxt complèx, tanben una discutida tecnica dins la sieuna especialitat. Pòt comunicar amb un grat d’espontaneitat e de fluiditat atal coma una convèrsa amb un locutor natiu sens tensions nimai per l’un coma per l’autre. Se pòt esprimir d’un biais clar e detalhat sus una gama granda de subjèctes, balhar son vejaire d’actualitat e expausar los avantatges e los inconvenients de diferentas possibilitats.

C- Utilisator experimentat

C1- Lo nivèl autonòm o de competéncia operacionala efectiva.
L’estudiant pòt comprene una gama de tèxtes longs e exigents, atal coma sasir de significacions implicitas. Se pòt exprimir espontaneament e corentament sens a cercar aparentament sos mots. Pòt utilizar la lenga d’un biais eficaç e sople dins sa vida sociala, professionala o academica. Se pòt exprimir sus de subjèctes complexes d’un biais clar e plan estructurat e manifestar son contraròtle de las aisinas d’organización, d’articulacion e de coesion del discors.

C2- La Mestresa.
L’estudiant pòt comprener sens esfòrç praticament tot çò que legís o ausís. Pòt restituir los faches e arguments de diversas sorgas escritas e oralas, ne fasent lo resumit d’un biais coerent. Se pòt exprimir espontaneament, fòrça corentament e d’un biais precís e marcar de nuanças de sens en rapòrt amb de subjèctes complexes.

Legir lo document sul site Eduscol