L’Occitan, qu’es aquò ? 2012
A l’escasença de la manifestacion Anem Òc lo 31 de març de 2012, l’Institut d’Estudis Occitans publiquèt la novèla version del document gratuit l’Occitan qu’es aquò.
Document dins son format A5, l’Occitan qu’es aquò es una platafòrma d’envòl cap al monde en òc : ne podètz saupre mai sus la lenga e la cultura occitanas. Son 28 paginas d’informacions que vos balharàn las claus per legir e prononciar l’occitan coma cal, apréner qualques frasas essencialas per se petassar dins la lenga, legir e cantar lo Se Canta amb sa traduccion, e ne saupre mai tanben sus la lenga e l’istòria occitana, sos personatges màgers, sa creacion artistica e literària, sos medias, sa plaça dins l’economia d’uèi e sul web.
Dins sa version 2012, lo document s’es fach renovelar : lo visual es mai leugièr e modèrne, dins lo qual lo tèxte tanben se legís melhor. Las versions en anglés e en espanhòl son ara disponiblas sonque en linha, sul site ieo-oc.org, e se pòdon accedir automaticament gràcias a de còdes flash estampats a la pagina 3 del document.
Aquel document es agratís e editat a 100 000 exemplars. Contactatz l’Institut d’Estudis Occitans (IEO) per ne venir quèrre a l’associacion e difusar aquesta brocadura e far descobrir o tornar descobrir la lenga e la cultura occitanas al public qu’aculhissètz dins la vòstra estructura.
Podètz trapar l’Occitan qu’es aquò alprèp dels labellizats Òc per l’occitan, dins nombroses oficis de torisme e associacions occitanas.Contactes
Per mai d’informacions, reçaupre de visuals o d’exemplars d’aqueste document : Contactatz l’IEO per mail ou telefòn : 05 34 44 97 11.Sèti de l’associacion
11 carrièra Malcosinat
31000 Tolosa