Al talhièr, traparètz las darrièras novelas sus l’IEO Federal e sas accions. Per cada fin de vesprada organizam un aperitiu tematic a l’entorn de nòstres projèctes. Sens parlar dels diplòmas amb mantun prenom occitan e del juòc que vos prepausam : un quizz !

Cada jorn, i avètz la presentacion de las activitats culturalas interregionalas : basa de donadas dels toponims occitans, accion pel bilingüisme aboriu, la guida "L’Occitan, qu’es aquò ?", l’annuari dels labellizats Òc per l’occitan e presentacion del labèl, del Servici de l’Emplec, Paginas Occitanas. En mai, las responsas del quizz que se farà passar sus las accions de l’IEO Federal.

Calendari dels aperitius tematics :

25/07 19h30 Apprenons l’occitan – Aprenem l’occitan :

Campanha de comunicacion 2012 dels corses d’occitan per d’adultes (projècte en partenariat amb lo CFPO). Ongan, 13 departaments se son engatjats a difusar los documents (cartèls e desplegants). Mai d’entresenhas.

26/07 18h Labèl economic Òc per l’Occitan :

Presentacion del labèl, del novèl site internet, de l’annuari 2012. Vos esperam nombroses per descobrir lo labèl coma las entrepresas labellizadas. Mai d’entresenhas.

27/07 18h Inauguracion oficiala de la bas de donadas dels toponimes occitans, en preséncia de Pèire Brechet, president de l’IEO, de representants de las collectivitats que sostenon lo projècte e de referents en toponimia de l’associacion. Serà tanben l’escasença de presentar lo foncionament de la Comission Toponimica Occitana. Mai d’entresenhas.

28/07 18h Bilingüisme aboriu e prenoms en occitan :

Ongan, dos departaments en mai an rejonch lo projècte, que serà presentat au public. Serà tanben possible, pendent l’Estivada, de demandar lo son pichòt nom en occitan… Mai d’entresenhas.

IEO Edicions

L’Institut d’Estudis Occitans a tostemps defendut l’idèia que l’edicion d’òbras e lo sosten a la creacion occitana an un ròtle irremplaçable dins la socializacion de la lenga e sa normalizacion. L’IEO contunha son trabalh d’edicion de creacion literàrias en lenga occitana e lor difusion. Ongan, los libres editats per l’IEO (IEO Edicions) seràn disponibles al talhièr de l’IEO. Serem uroses de vos i rescontrar !

NB : Pr’amor d’un cambiament de foncionament, avisam lo monde de non pas comandar a travèrs del site internet d’IEO-IDECO als meses de julh e d’agost (Mai d’informacion a la davalada de 2012 sul site de l’IEO).

Escòla Occitana d’Estiu

L’EOE, seccion d’Òlt e Garona de l’IEO, serà tanben presenta a l’Estivada en çò del talhièr de la seccion federala de l’associacion. Serà una escasença de vos entresenhar per la setmana de formacion en estiu (agost de 2012) coma en ivèrn (a la debuta de 2013).

Crida als benevòles

Los aderents de l’IEO son planvenguts per ajudar, lo temps d’una pausa e en foncion de lors disponibilitats, a tenir lo talhièr de l’associacion pendent los 5 dias de l’Estivada. Vos podètz marcar en tot mandar un messatge a comunicacion@ieo-oc.org o sus plaça.