Anem Oc : fin de la coordination
Fidèu a son ròtle federator e recampaire deis energias au servici dau desvolopament de la lenga occitana e d’una politica linguistica, l’IEO entreprenguèt lo 15 de decembre de 2012 una accion volontarista per temptar de reviudar la « Coordinacion Anem Òc ! per la lenga occitana ! » ambé totei sei compausantas (que d’unei èran absentas de la Coordinacion organizaira de la manif de Tolosa 2012).
Mai d’un an puei, l’IEO es obligat de constatar una manca de volontat vertadiera d’unei compausantas de s’endevenir e de tornar obrar ensems :
- ambé lo refús de signatura de la Pacha de convivéncia per la FELCO,
- çò que representa, ditz Calandreta, una impossibilitat per ela de trabalhar ambé la FELCO,
- ambé lo Felibritge que respònde qu’a pas temps de s’ocupar de la reactivacion d’aquesta Coordinacion,
- ambé la letra mandada per Oc-Bi que l’IEO ne’n pòt gaire acceptar nimai lo ton nimai lo contengut : entre autra negacion dau trabalh relacionau establit ambé leis autrei lengas despuei desenaus d’annadas, negacion dau ròtle istoric de l’IEO dins l’organizacion dei manifs despuei 2005 (l’IEO qu’a totjorn pres en carga l’organizacion concreta de l’eveniment e assegurat la coordinacion ambé leis autrei compausantas per la mesa en plaça, etc.)
Per ansin, lo Consèu d’Administracion de l’IEO, recampat aqueste dissabte 5 d’abriu de 2014, a Tolosa, pensa que l’IEO a pron consacrat de temps e d’energia sus la question de la « Coordinacion Anem Òc ! per la lenga occitana » sensa resultat e adonc n’acta la fin.
L’IEO contunharà pasmens a trabalhar
i) a una (d’) accion(s) comuna(s) ambé totei leis associacions de bòna volontat sus d’amiras consensualas e
ii) ambé leis autreis lengas de França per definir lo moment lo mai adaptat au calendier electorau (e ai cambiaments e evolucions que son a se faire) per mobilizar leis actors culturaus occitans sus la question revendicativa.
L’IEO ramenta l’importància d’una accion interregionala en rason de seis efiechs, extèrnes e intèrnes, e avisarà lo mitan cultural occitan de sei decisions tre que possible.