Lo 12 de setembre de 2014 a Tolosa, que s’es organizada la quatau ceremonia de labellizacion PARLESC (per 2014-2015). Lo comitat de labellizacion, que compren representants benevòles e salariats de la federacion de l’IEO e deu hialat deus CFPOs qu’avó lo plaser d’oficializar la tièra deus cors labellizats. Que son donc un chic mei de 130 cors labellizats que se poden trapar, mercés au logo dabs los 3 chòts, dens la rubrica cors deu siti aprenemloccitan.com ; un labèl de qualitat, qu’asegura un nivèu a minimum pertocant a la progression pedagogica, au nivèu de l’ensenhaire, eca.

Los representants de las associacions presentas qu’avón l’escasença de presentar los lors cors com de har coneisher aus elegits presents (David Grosclaude per la region Aquitània, Guilhèm Latruvèrsa per Miègjorn-Pirenèus, Gustau Alirol per Auvèrnhe, e Samir Hajije per la comuna de Tolosa) las dificultats a desvolopar los cors per adultes, mes tanben l’enveja comuna d’augmentar lo nombre de locutors en çò deus adultes e, atau, de contunhar a assegurar un ligam intergeneracionau entre los qu’aprenen l’occitan a l’escòla, e los ancians. Pèire Brechet, president de l’IEO, Cedric Valmary, director deu CFPO-MP; acompanhats peus elegits, qu’avón lo plaser de balhar los lors certificats aus representants deus cors. Au cap de 4 ans de mesa en rota, lo labèl qu’es pro madur tà passar a d’autas estapas; atau, lo monde recampat au parat de las taulas redondas organizadas en debuta de vesprada qu’an podut perpausar pistas d’evolucion deu labèl, simplificacions dens lo procediment de labellizacion, besonh d’acompanhament de la part de Parlesc entà assegurar l’estructuracion de l’auhèrta de cors. 2-3 formacions PARLESC que’s deverén organizar abans la fin de l’annada, en Aquitània e Miègjorn-Pirenèus.

Lo Comitat de pilotatge que mercejan tots los qui, pr’amor de’u lor engatjament, e permeten ua estructuracion deus cors, au servici deus aprenants e de la lenga occitana.